Къаман проекта моттигашца бартчӏоагӏама болх дӏахьош латт вай мехка
Вахарера моттигаш меттайоалаярах йолча къаман проектага гӏолла 10 никъ тоабеш болх дӏабахьа лерхӏ вай мехка 2026-ча шера. Цох даь бартчӏоагӏамаш да. Из хоам «Сердалога» бир цу оагӏонцарча министерстве.
«Нийсса ах болх чакхбаккха эшаш дар хьакхаьчад, цунга хьежжа дӏайха денош хьаотташехь болх дӏаболабергба, Дала аьннадале. Къоастаяьча ханага хьежжа, чакхдаха лерхӏ деррига балхаш», - белгалдир наькъий гӏулакхех йолча министерствонна хьалха латтача Хаматхановгӏар Батыра.
Болх дӏаболабе кхоачашде дезараш тахан 80%-га кхоачаш кийча да. Бархӏ моттигацара гӏулакх чакхдаьккха даьннад, шин наькъашца дувзаденнараш а кастта кийча хургда.
Цу оагӏонцара гӏулакх боаггӏача боараме чакхдаккхаро оттаяьча хана шоай болх йистебаккха аьттув лу къахьегамхошта. Укх шера тоаде дезараш вай мехка лоархӏаме дола наькъаш да.
