Хоржамий деношка ишколай, колледжий балхах дийцар мехка
Хоржамаш долча деношка мехкара ишколаш, колледжаш болх беш хургйоацаш оттадир мехкарча дешареи ӏилмани гӏулакхех йолча министерстве. Укх бетта 18-ча денгара 20-ча денга кхаччалца Паччахьалкхен Думан, Халкъа Гуллама хоржамаш хиларга хьежжа, мехкара кхерамзлен хьал лорадара тӏехьа хьалххе кийчо еш, хоржама комиссен новкъарле е тарлураш юстардоахаш ба мехка. Дешареи ӏилмани гӏулакхех йолча министерствонна хьалха латтача Цхьорой Ахьмад-Башира цу гӏулакхах долча амара кулг яздир укх деношка.
Цу моттигера «Сердалога» беча хоамах дешара моттигашка уж хувцамаш юкъедоаладар тайп-тайпара хургда. Республикерча ерригача ишколашка тов бетта 17- ча денгара 21- ча денга кхаччалца дешаш хургбац.
Хӏаьта юкъерча оагӏонцарча дешара моттигашка диллача, хоржама болх дӏахьоча колледжашка, техникумашка дешар соцадаь хургда.
Иштта да берий бешамашкара хьал а – бахархошта кхадж тасса моттигаш къоастаяь берий бешамаш болх беш хургьяц цу деношка.
Студенташа, даьша, ноаноша хьалххе тахка деза из гӏулакх дешара моттигашкарча администрацешка гӏолла.
