Гӏалгӏай мехка турпалча ханех бола дагалоаттам чӏоагӏбеш ба
Гӏалгӏайчен Магӏалбика кхале дӏаяхача турпалча ханашкара дагалоаттам, даим бахаш хургболаш, чӏоагӏбергба. Кхален юрташка дӏадоладаьд «Тӏема сийлен юрт» яха дагалоаттама сийленгаш увттаде. Из сийлен цӏи елар Деби-Юрта, Юкъерча, Йоккхача Ачалкхенашта, Вежарий-Юрта, Махьмад-Хитӏенна, Дола-Коана, Инаркъена, Соагӏапчанна. Гӏалгӏайчен Кулгалхочун Амарах баь болх ба из. Цу цӏеро хьагойт цу юрташа исторен оагӏон тӏа лоархӏаме дакъа дӏалаьца хилар. Къаьстта укхаза, Сийлахь-боккха Даьймехка тӏом болаш, лаьттар Магӏалбика моастагӏа тӏа ца вуташ йоаржаяь тӏема операци, цо хийцар Кавказ йоаккхаш лаьттача къовсама хьал.
«Магӏалбика кхален юрташ хилар денал гойташ моастагӏчун духьалъ- эттараш. Нах даим халача хьалашка болх беш бар, чудеттача моастагӏчун герза кӏалха гӏолла, еттача йоккхийча топех кхера ца луш, юха ца боалаш, цар новкъостал дора салташта. Цу юрташа гойта денал - из духхьал турпалал хинна ӏац. Из дар шоай къонгаш тӏем тӏа бигача ноаной денал, боккхийча наьха, кхувш доагӏача ноахала къахьегам. Уж тешаш бар котало гарга хиларах, цудухьа, эггара халагӏча деношка а ца бохаш, духьалъэттар уж моастагӏчунна», - йоах «Сердало» газетага Магӏалбика кхален администраце.
Дагалоаттама сийленгаш оттадар - из даьшта карагӏдаьннар, диц ца деш, лоархӏаш хилар да.
