Нувхаш къоастаеш йола моттиг хьаелларгья вайцига 2026-ча шера
06.12.2023 12:07
ЧӀоагӀа йола нувхаш Ӏоаеш хургйола майда хьалъе дӀаболабеннаб республике. Из хургйола доазув къоастадаь, лаьттан хьал миштад тохкаш бола болх чакхбоаккхаш ба цу даькъ тӀара къахьегамхой. 2025-ча шера хьалъе йолаергья из моттиг, 2026-ча шера кийча хила езаш я из. Цох лаьца дийцар дӀайихьача зарбан кхетаче вай Мехкадас. Из хоам «Сердало» газетага бу паччахьалкхен зарбан болхлоша.
«Йоккхача Ачалкхерча лаьтта Ӏоюлларгья полигон. Буро тӀарча, Магасерча аэропорташта тӀехьашкахьа дӀауллача 6-ча аэродрома юхерча доазон тӀа хургья из. Эггара лоархӀамегӀа дар - нах бахача моттига гаьна уллаш доазув да из. 17 метр Ӏочуаьхкачул тӀехьагӀа, хий хьалтӀадаьннадац. Еррига кӀоаргал лоабатах латт», - белгалдир Келаматанаькъан Махьмуд-Ӏаьлас. Теркалде деза, из беррига болх Ӏалама гӀулакхах йолча министерствонна кулгал деча Хьулахой Саварбика тӀахьожам беш дӀахьош латтилга.
