Коки яхача лоаман моттиге, къахьегама шоатта дӀадихьар
02.09.2024 11:44
Лоаман моттигашкара къайленаш тохкаш боккха болх дӀаболабе кийчлуш ба «АСМ групп» болхлой. Цу оагӀонца дийза къахьегама шоатта дӀадахьа арабаьлар ЖӀайрахьа-Ассински музея къахьегамхой Коки яхача гӀалай доазон тӀа, Кокурхой тайпан нахаца.
Из хоам «Сердало» газетага бир музее. «Къотаргаш дӀайоахаш, буц дӀахьокхаш лостам бир гӀалай доазон тӀа», - белгалдир музея болхлоша. Из тайпара болх цар каст-кастта дӀакхухьаш латт. Лоаме салаӀа ухача мехкахошка дехар ду, боккъала а лораде Ӏалам, шоашта тӀехьара нувхаш дӀаяха, Дала вайна хьаенна беркате моттигаш толха ма е!
