Мехкарча «Даьхен лорабой» яхача ганзо 3 эзар совгӏа гӏулакх техкад
Укх кхаь шера «Даьхен лорабой» яхача ганза моттигерча оагӏонга гӏолла 3 эзар совгӏа гӏулакхех болх дӏабихьаб. Из хоам «Сердалога» бир Мехкадаь зарбан болх лелабераша.
«Тахан кхо шу дизар «Даьхен лорабой» яха ганз хьакхоллаш долча амара кулг яздаь. СВО доакъашхой, цар цӏагӏарча наьха гӏулакхага хьажа аьнна Россе Президента Путин Владимира яь чӏоагӏо яр из
Вай мехка къонгаш тахан Даьхен гӏулакха арабаьнна; майралца, деналца шоай декхараш кхоачашдеш латт тӏема аренашка. Вай массане терко лоаттае еза, лерхӏамца цӏи яккха еза нах ба уж», - белгалдир вай мехкадас Келаматанаькъан Махьмуд-ӏаьлас.
Иштта мехка кулгалхочо дийцар тахан СВО доакъашхошца, цар цӏагӏарча нахаца лоаттабеча балхах. Ганза доакъашхоша цар тӏадена хаттар, гӏулакх тохкаш, вахарера юридически, унахцӏенон оагӏонцара кхоачамбоацараш меттадоаладеш къахьег.
Хӏара сага гӏулакхага къаьстта терко еш хьожаш дӏабахьа беза болх ба из. СВО доакъашхошка, цар цӏагӏарча нахага хьажар тахан хьакимашта хьалхашкара керттера декхар да.
«Къаьстта теркалде лов «Даьхен лорабой» яхача ганза кулгал деча Цивилева Аннас боккха болх лоаттабар. Цун хьалхаленца тахан лоархӏаме декхараш кхоачашдеш хьабоагӏа ганзе. Боаггӏача боараме цо къахьегарах; тахан бӏухошта, цар дезалашта, хьакимашта юкъе бувзам ба.
Россе Президентаца Путин Владимираца хиннача кхетаче а къаьстта терко еш дийцар цу гӏулакхах. Тахан вай республике дӏахьоча балхах дийца, дӏахо йодача хана из кхы а дикагӏа тоабергхиларах дийцар аз», - аьлар вай ММехкадас.
Мехкарча хьакимаша, паччахьалкхен моттигаша цхьана дӏахьош болх ба Даьхе лорае арабаьннарий, цар дезалий хьашташ кхоачашдар.
