«Профсоюзашта хьалха латта къонавар» яха яхь дӏахьоргья вай мехка
Мехкарча «Гӏалгӏай республикан профсоюзий оагӏонаш цхьанкхетар» яхача Союза хӏанз диазлагӏа дӏахьоргья «Профсоюзашта хьалха латта къонавар» яха яхь.
«Магасерча кагирхой кхетачен цӏагӏа, ше-ше коталонга кхача гӏерташ, хьовзаргба начӏал дола, дикка гаьнабала ловш бола кагирхой. Маьцхали бетта 18-ча дийнахьа хургья яхь. Дехар чуэцаш бола болх дӏаболабаьб. Дакъа лаца ловраша ooprӏ06@maӏl.ru электронни адресах чудала деза шоай дехар, «Профсоюзашта хьалха латта къонавар - 2026» яха белгало оттаеш.
Дакъа лаца ловраша яхьанца дувзаденнараш дикка тахка деза хьалххе, шоаша дергдола къамаьл а боаггӏача боарме кийчде деза», - дийцар тхога профсоюзий моттигий оагӏоно. Цунна хьалхаэттараша белгалдечох, къонабарий вахаре мел дола хӏама чулоацаш хургда из гӏулакх.
Шоаш хьахержа гӏулакх дикка ӏомадеш мара боацараша а, караерзаяь говзал балхаца гойташ бараша а къахьегама гӏулакхех йола бокъо лораяра, вахара оагӏонцара бувзам чӏоагӏбара тӏехьа шоашта пайдане хургда аьнна хетараш довзийтар лоархӏаме да цига. Профсоюзий балха юкъе керда нах чуозаш я яхь, укх диъ шера. Укх шера шин оагӏонца бекъаргба доакъашхой. Лоархӏамеча цӏерга кхача гӏерташ, шоай мел бола низ, говзал хьахьокхаш хургба студенташи дешархойи санна, таханарча дийнахьа къахьега болабенна бола къона говзанчаш.
«Дехараш чуийдеш бола болх дӏаболабеннаб. Профсоюзий оагӏонца шоай декхараш бехктокхаме кхоачашдеш хургбола, шоашца болх беш, дешаш болча наьха бокъонаш меттаоттае ховргдола, шоашкара пайдане хургдола кердадараш доаржадергдола нах ба эшараш. Цудухьа шин оагӏонца бийкъаб оаха из болх. Деша багӏача моттиге, е къахьегаш болча царна дагадехараш, кхоачашде лаьрхӏараш хьаллаца, доаржаде кийча долга царна дӏахайта аьттув ба из тахан», - дийцар республикерча Къоначар профсоюзий моттигий оагӏон хьалха латтача Цӏолой Ислама.
