«Дезал» яхача къаман проектага гӏолла, Эбарга-Юртара культуран Цӏа тоадир
Боккха болх дӏахьош тоадир Эбарга-Юртарча культуран Цӏен хьал. «Дезалера лоархӏамедараш, культуран оагӏонца дувзаденнараш» яхача, Россе Президента чӏоагӏонца йоаржаяьча «Дезал» оалача къаман проекта моттигерча программага гӏолла дӏабихьаб из болх.
«Юрта хьал хӏара денна тоалуш латт, цунга хьежжа товш, боаггӏача боараме тоадаь хила деза культуран Цӏа а. Гӏишлон тӏера тхов хувцаш, тӏера куц меттадоаладеш, чура кабинеташ тоаеш, кондиционераш, видеокамераш оттаеш, йӏовхалца, токаца дувзаденнараш эргадоахаш, къахьийгад цига. Боаггӏача боараме тоадаь латтача культуран Цӏагӏа вӏашагӏбеттабала аьттув ба тахан юртахой, бераш шоай кружокашка аха, тайп-тайпарча кхетаченашка дакъа лаца йиш йолаш да. Культуран Цӏагӏа лоархӏамедараш дашха гуллу юртахой, цунга хьежжа лертӏа хила еза из моттиг», - язду ший Телеграм- оагӏон тӏа вай мехкадас Келаматанаькъан Махьмуд-ӏаьлас.
Республикан кулгалхочо белгалдир, ютрашка культуран оагӏонца дувзаденнараш меттадоаладара тӏехьа боккха болх дӏахьош латтилга. «Дезал» яхача къаман проектага гӏолла, доккхий хувцамаш деш, тоадеш латт Алхастера культуран Цӏа. Белгалде деза, цу программага гӏолла Къаман библиотеке боккха болх дӏабихьалга, Магӏалбике хьалъеш латт кхоллама ишкол, Магасе – филармони, музей.
