ЦӀаьхха шелал оттарца, цӀерцара хатараш даьржад мехка
ЦӀаьхха, шийла денош оттарца цӀерцара хатараш даьржар вай мехка, хӀаьта царех дукхагӀдараш бахьан тока саьргий замыкани йолаш да. ДӀадахача кӀира цӀи яьнна 10 моттиг хилар вай мехка, царна юкъера ялх хатар замыкани хилар бахьан долаш дар.
«Сердалога» из хоам бу республикерча Россе МЧС ГУ. МЧС болхло волча Оздой Руслана белгалдечох, цӀераш ювлара бахьан тока саьргаш, сов чӀоагӀа дӀохаденна, цӀийдалар да. Ара геттара шелал эттача, наха массехк йӀовхал лоаттаю гӀирс чубехк, тишденнача саьргаша из низ ца ловш, цӀи йоал.
«Иштта ха латтача хана чӀоагӀа фийла, токаца хоттам болча хӀамашка хьожаш хила веза. Тока розеткай, тока саьргий хьал миштад хьежа беза нах, къаьстта чӀоагӀа хьежа веза бӀарга ца гуча йоахкарашка. Иштта йӀовхал лоаттаергаш лоталургйолча хӀамашта сов юхе Ӏо ма увттае, масала, корага дадача кӀадашта, кӀувса, дахчан хӀамашта юхе.
ЦӀагӀара аравоалача сага шелал лоаттаергагара дӀа мел йола хӀамаш тока чура хьаяха еза, хӀана аьлча цӀаьхха ток ӀотӀакхийтта хӀама хуле, лотаялар кхерам ба уж.
Дийлла спиралаш дола плиткаш ма лоаттае йӀовхала, чӀоагӀа кхераме я уж», - дийцар Оздой Руслана.
