Махьмад-ХитӀе-2-Керда Редант яха тока лини тоаеш боахк болхлой
Махьмад- ХитӀе - 2 - Керда Редант яха 35 киловольтах латта тока лини тоае арабаьннаб цу мгӀарера болхлой. Из хоам «Сердалога» бир Къилбаседа Кавказа россеташ яхача оагӀон зарбан болх лелабераша. Цу лине ток лоаттаю МагӀалбика кхален 12 эзар совгӀа адам дахача йиъ юрта - Кердаа Реданта, Аьккхий-Юрта, Заьзгакъонгий-Юрта, Даби-Юрта. Цу балха кулгал деча Ваделганаькъан Хьусена яхачох, цу ерригача юрташкара тока хьал хоалуш меттаоттадергда дӀахьош латтача балхо.
«Тока пхи бӀоагӀа, 6 км кхоачаш дола тишденна тока саьргаш, 1000 совгӀа «пела» хувцаргда цига.
«Ингушэнерго» филиалера 8 саг воалл цига къахьегаш. Ушалаш йолаш, болх беш валла хала моттиг я из, цудухьа сихха чакхбоаккхалуц болх. Дале а, тхоай декхараш бехктокхаме, дизза кхочашде ловш да тхо», - дийцар Ваделганаькъан Хьусена.
