БӀаьстан кхашкара балхаш дӀахьош да
ГӀалгӀайче дӀадоладеннад, бӀаьсти деш дола кхашкара балхаш. Цох дийцар ГӀалгӀай Республикан юртбоахама министра Гаьгенаькъан Мухьмада. Из хоам тхога бир цигарча зарбан болх лелабераша.
Министра яхачох, 42,6 эзар гектар лаьттан тӀа дӀаде лаьрхӀад ялат. Царех мукх - 3,9 эзар гектар, хьажкӀаш - 20,9 эзар гектар, кен - 4,3 эзар гектар, гидуаргаш - 2,3 эзар гектар, коартолаш - 1,5 эзар гектар, баьцадаараш - 0,7 эзар гектар, рапс - 0,4 эзар гектар, даьттакхеш - 1,9 эзар гектар, гета - 0,8 эзар гектар, доакъара культураш - 5,9 эзар гектар.
ДӀабийна баьннаб 3,8 эзар гектара тӀа кен, 3,5 эзар гектара тӀа мукх.
«Республикан деррига боахамаш эшаш мел долча фуца Ӏалашо яь да, лаьтта хьаьндаь, тоадаь да, езаш йола минеральни молхаш дӀатехай. ХӀанз кхашкара балхаш дӀахьош я 600 техника. Деррига балхаш графиках доагӀаш долчча беса дӀахьош да», - аьлар Гаьгенаькъан Мухьмада.
