Заӏапхой болча СВО ветеранашта къаьстта терко лоаттаю
Тӏема операце заӏапхой болча ветеранашта мехка къаьстта терко лоаттаю. «Даьхен лорабой» яхача ганза доакъашхой массахана царца бувзаме болаш; эшар, доацар фуд тохкаш, болх лоаттабеш ба.
«Магӏалбикерча ганза филиала болхло вола Коазой Хьамид ӏарчакханаькъан дезал болча каст-каста водаш ва. Цу наьха цхьа воӏ тӏема аренашка латт, Даьхен гӏулакх деш, хӏаьта Алисхан яхар, цу моттигашка дегӏа човх хинна, заӏапхо волаш ва. Диабет яха лазар дегӏаца долча цун наьнага фу хьал да, Алисхана тахан дезар, эшар фуд тохкаш, хилар ганза болхло. Шоашта терко лоаттаяра чӏоагӏа раьза болаш, баркал оалаш бар уж нах», - дийцар тха газетага.
Хьалхагӏа «Сердалога» гӏолла хоам баьбар оаха, ӏарчакханаькъан дезал чубаха дукхача гӏатех латта цӏа харцар кхерам болча хьале хиларах, царна цхьацца новкъостал даьд, аьнна. Нах дӏачубахийта керда цӏа хьалдеш латт, кастта кердача, паргӏатагӏа долча цӏагӏа бахаргба уж.
