СВО ветерана новкъостал дир, лакха дикал йолча гӏирсий гӏонца лорашка чакхвала
«Даьхен лорабой» ганза Гӏалгӏайчен филиала дӏахо а новкъостал лоаттаду лаьрххӏача операце доакъашхошта дарба дарца дувзаденна гӏулакхаш деш. Шолжерча ганза даькъе новкъостал эшаш вера СВО бӏухо Оздой Жабраила Темарлан. Из вахар 2023 шера тӏема мугӏарашка Санкт-Петербургера, 2025 шера цигара цӏавера. Лакхача технологей дарба дезаш вар бӏухо республикан арахьарча лаьрххӏача клинике. Цудухьа квота яккхара новкъостал дезаш вера из цига.
«Цунна новкъостал де дагахьа, вахара оагӏонцара болх лелабу Элмарзанаькъан Амина бувзаме яьлар ветерана дарба деш волча лораца, даим квота хьаялара тӏахьожам а лоаттабир цо. Из хьаийцачул тӏехьагӏа, ганза болхло юха а бувзаме яьлар Ставрополь-Шахьара лорий дарбанченца, цо кхоачашдир балха даькъ тӏара из лорашка чакхваккхара дола гӏулакх, - аьлар «Сердало» газетага цу ганзе.
Цигара балха тоаба ший декхараш дика довзаш хиларах, из дош лоацача хана кхоачашдаь даьлар. Ветерана эшаш йола квота хьаелар, лаьрххӏа дӏаязвир бӏухо арахьарча дарбанче.
Чакхвалара йола бокъо шийна яларах, Даьхен бӏухочо Оздой Темарлана баркал аьлар шийна гӏо даьча болхлочоа, гӏулакх чакхдаллалца цо иштта теркам барах.
