СВО доакъашхочунна новкъостал дир, ший йолча говзалга хьежжа балха отта
Лаьрххӏача тӏема операце бӏухочунна балха отта, профессиональни кийчо е, кхыйола балха говзал караерзае таро ялар - из керттера лоархӏаш да «Даьхен лорабой» ганза Гӏалгӏайчен филиале. Говзанчаша цу даькъ тӏа лаьрххӏа дола новкъостал лоаттаду бӏухошта, цул совгӏа керда говзал караерзае а таро лу царна. Цу тайпара новкъостал дир СВО бӏухочун Келиганаькъан Ювсапа. Из венавар филиале, шийна гӏо дар дехаш.
«Даьхен лорабой» ганзе «Сердало» газетага ма аллара, 2020-2022 шерашка Келиганаькъан Ювсап Росгварде мугӏарашка амал деш хилар. Юххьанца из тӏахьийхар Волгоградски областе эскаре гӏулакх де, цо лаьрхӏар СВО тӏема операци дӏахьоча вахара контракт чӏоагӏъе. Цига денал гойтарах, бӏухочунна майдилг елар. Из лакхара юридически дешар дийша ва.
Республикан ганза филиала вахара оагӏонца бувзабенна болх лелабеча Беканаькъан Фатимас сиха цунгара дехар хьаийцар. Цо массайолча оагӏорахьара новкъостал дир цунна, эшаш дола каьхаташ доахаш, цул совгӏа цунна езаш йола балха моттиг лехар Дукха декхараш кхоачашдеча центре, цо ше къаьстта къамаьл дир урхаллен кулгалхошца.
Балхаца дувзаденна из къамаьл дика дӏадихьа, шин кӏира ӏомавенна ваьлча Келиганаькъан Ювсап лаьрххӏа дӏаязвир МФЦ штата чувоагӏа говзанча санна. Ветерана дег чура баркал аьлар Беканаькъан Фатимайна, иштта «Даьхен лорабой» ганза тоабанна, шийна сиха новкъостал дарах.
