Дешархошта лаьрхӏа Денала урок дӏайихьар СВО ветеранаша
«Мужече» яхача спорта кийчо еча моттиге, къонабарий Даьхенцара безам чӏоагӏбарах йола Денала урок дӏахьош хилар тахан. «Даьхен лорабой» яхача ганза мехкарча филиала болхлоша, «Авангард» яхача оагӏонца цхьана, дӏахьош болх бар из. Къонабарашца къамаьл деш хиннараш бар цу моттига хьалха латта Бохтаранаькъан Мадина, филиала болхло ӏарапханаькъан Мухьмад, лоархӏаме хьаьший - СВО ветеранаш Хьаьшанаькъан Руслан, Темархананаькъан Амиран, Бохтаранаькъан Батыр.
«Тӏема аренашкарча доттагӏалах, тӏема декхараш кхоашдеш лораде дезарех, дийцар къонабарашка. Тӏема операце доакъашхоша белгалдир Даьхен гӏулакха латтар, деналца, майралца ший хӏама лорадар, нийсача хӏаман тӏехьа волаш дӏачакхвалар моллагӏча къонахчоа мел лоархӏаме да», - йоах «Сердалога» «Даьхен лорабой» яхача ганза филиалера бенача хоамо.
Тӏема аренашка лелача хана, цӏагӏара шоай оагӏув хьаллоацаш хиларах, Даьхенцара безам, лерхӏам чӏоагӏбар хӏаране декхар долгах дувцаш, хилар цига СВО доакъашхой.
Филиала болхло волча ӏарапханаькъан Мухьмада хьоахадир, тахан йоаржаеш йолча къонабарий проекташка цар дакъа лаца йиш хиларах, иштта тӏемхой, цар цӏагӏарча наьха хьашташ кхоачашдеш, хӏара денна дӏахьоча балхах.
