«Баьццара уйче» яхача оагӏонга гӏолла, шоай дегӏа могашалга хьожаш ба мехкара СВО ветеранаш
Шоай унахцӏенон хьалага хьожаш, лорашка чакхбоалаш ба тахан мехкара СВО ветеранаш. Бӏухоша белгалдир, лораш шоашка дика хьожилга, «баьццарча уйченга» гӏолла анализаш дӏачуяла, чакхвала дикка аттагӏа долга. «Даьхен лорабой» яхача ганза мехкарча филиала, унахцӏенон министерствон болхлоша бувзам лоаттабеш; цхьана болх дӏабахьарах из гӏулакх сихагӏа чакхдаккха вӏаштӏехьадоал бӏухой.
«Унахцӏенон хьал дикка тохкаш, массаболча лорашка чакхваларах, сай дегӏа фу эш хайра сона. «Даьхен лорабой» яхача ганза филиала болхлоша гӏо деш хиларах, дӏаьха кӏираш даха ца дезаш, сиха чакхвала аьттув хилар са. Белгалде деза, лораш шоашта могачох терко еш, дика хьожаш хиннилга», - дийцар «Сердалога» СВО ветерана Темарханаькъан ӏамархана. Из гӏулакх чакхдаьккха баьннача тӏема операце доакъашхоша белгалдечох, тӏема аренашка хинна хӏара бӏухо чакхвалар лоархӏаме да. СВО ветерана Балхайнаькъан Мухьмада дийцачох, контузи хинначул тӏехьагӏа корта лазабувлаш лела дукха ха яр из; бакъда, кӏаьдваларах хургда-кх, яхаш, дукха теркалдацар цо из хьал. Дегӏа хьал тохкаш хьежача, невролога массехк тайпара дарба яздир цунна. Тахан цо белгалдечох, дикка меттавенав из, корта хьалха санна лазац, наб а боаггӏача боараме ю цо.
Ханнахьа лорашта тӏавахарах лазар кӏоаргадалале гучадаьлар, хӏаьта из чӏоагӏа лоархӏаме да. «Даьхен лорабой» яхача ганза мехкарча филиала болхлой, бӏухошта гӏо деш, царна уллув хургба уж чакхбаьнна баллалца. Лорий дарба даьчул тӏехьагӏа, дӏахо кхы а дикка меттабоагӏаргболаш, эшаш дола каьхаташ гулдеш, новкъостал ду цар ветеранашта.
