Хозадар, ийрчадар къоастаде безам боацарашта гӀод тох Наьсаре
15.05.2024 09:27
ХӀама бе доацача бахархошта духьала болх дӀакхухьаш, къахьегаш хьабоагӀа Наьсарера хьакимаш, дӀадахача ахкан хана денз. Мел хьежача а кхы цар кхетам нийсбе ца мега, гӀод тохаш бехктокхаме оза лаьрхӀад цу мугӀарера нах.
Коталон цӀи йолча урам тӀа нувхаш Ӏоувттаяь 23 саг гӀод такха оттаваьв. Из хоам «Сердалога» бир шахьара администраце. ГӀод тохаро меттабоалабир нувхаш Ӏоувттаяьраш. Бувцаш бола урам карарча хана цӀена латт.
«Цу тайпара болх дӀахо дӀабахьа лаьрхӀа ба администраце болхлой, Интернациональни, Гикало оалаш дола урамаш юкъелоацаш. Оаха хӀара денна камерашка гӀолла тохкаш латт из ийрча гӀулакх. Бокъо йоацача моттигашка нувхаш Ӏоувттаеш, шахьарерча урамий куц толхадераша доаггӀаш дола гӀод токхаргда», - дийцар тхога администраце.
