Наьха ахча лечкъадаьчун духьала гӏулакх хьадийллар мехка
Наьха ахча диача кхалсага духьала гӏулакх хьадийллар мехкарча МВД. Из хоам «Сердалога» бера цу моттигера.
«Лоалахарча республике яхаш йолча Магӏалбикерча 38 шу даьннача яхархочун, иштта карарча хана тохкама болхлошта бовзаш боацача кхыболча зуламхошта духьала РФ УК 2-ча даькъа 159 ст. гӏулакх хьадийллар мехкарча МВД Тохкама оагӏон къахьегамхоша, зулам гучадоаккхаш», - йоах тхогарча хоамо.
Тохкамхоша белгалдечох, 2023-ча шерарча маьтсела бетта цу кхалсага, шийца кхы а зуламхой болаш, бӏарчча тийшаболх вӏашагӏбеллаб. Вахара оагӏонцара ӏаьдалгара ахча хьадоагӏа шоана, из хьаэца оаха гӏо дергда, аьнна, леваьв цо мехкара пхи саг.
Бокъонга диллача цо леладер нийса гӏулакх да мотташ хиннача наха 170 эзар сом ахча дӏатӏадахьийтад цун карта тӏа. Хӏаьта зуламхоша ахча шоашта ма тов диад.
МВД болхлоша даггара кхайкарал деш латт нахага боккъал а ма ӏехадайта шоаш, яхаш! Оашош леладеча хӏаман уйла еш, фийла хила! Ца бовзача нахаца цхьаккха базар ма лелае!
