Боккха тийшаболх кхостабаьрашта духьала гӏулакх хьадийллар ӏаьдало
Наьсарерча СУ СК Тохкама оагӏон болхлоша гӏулакх хьадийллар доккхача ахчанца тийшаболх кхостабаьча шин вахархочоа духьала (РФ УК 4-ча даькъа 159 ст.). Тохкама болхлоша белгалдечох, дӏадахача шера кӏимарса бетта аттача ахчанца хӏама тоаде ловш бӏарчча тийшаболх вӏашагӏбеллаб цар. Магасе хьалдеш латтача цӏагӏара квартира йохкаш гӏулакх вӏашагӏделлад цар мехкарча яхархочунца, бакъда шоаш дувцар кхоачашде лаьрхӏа хиннабац зуламхой юххьанца денз.
«Кхалсага царга дӏаеннай ший 2 800 000 мах бола машин, 50 000 эзар сом ахча. Цхьа ха яьлча кхы а 350 000 эзар сом дӏатӏаденнад цо. 3 200 000 сом ахча каракхаьчачул тӏехьагӏа шоаш кхоачашдергда аьннар кхоачаш ца деш, ахча шоашта ма лов диа, байна дӏабаьннаб тийшаболх кхостабаьраш», - дийцар «Сердалога» мехкарча Тохкама оагӏон болхлоша.
Тийшаболх баьраш кхыдолча зуламашта юкъе хиннабий хьожаш, из гӏулакх дикка тохкаш, болх дӏахьош ба мехка. Уж бехке бе йиш мел йола хӏама гулдеш ба тахан ӏаьдала болхлой. Нах ӏехабеш, наьха хьакъ дуаш, бӏаьхий хила гӏийртараш суда духьалъоттаргба.
