Гӏалгӏай мехка хьадийллар полице болхлочунна кулгаш тӏадахьарах дола гӏулакх
Наьсарен тохкама даькъа болхлоша моттигерча кхаь вахархочунна духьала уголовни гӏулакх хьадийллар. Уж бехке бу ӏаьдала викала низ баь хиларах (РФ УК 1 д. 318 ст.). Полице болхлочун вахар хӏанз унзарча хьале дац, бакъда законаш кхоачашдеш волча викала тӏакховдар бахьан долаш царна уголовни бехк бергба.
«Тохкам баьраша яхачох, карарча шера тов бетта 14-ча дийнахьа, Гӏалгӏай мехка гӏолла йолча Россе МВД ГИБДД ДПС ОБ инспекторш ӏуйрийна «Эккажкъонгий-Юртара го» оалача моттиге шоай болх дӏабахьара хьакхаьчар. Цу моттиге болхлоша зийра, ДТП юкъе хинна цхьа машин эвакуатора тӏа йоаккхаш. Хиннар техка даллалца из моттиг лораяра, ДТП бахьан довзара, из машин дӏа ца йигийта хьежар полице болхло. Цунна духьалваьлар кхо маӏа саг, цар дика кхетадора ӏаьдала викал из хилар а, машина дӏа ца йигийтар бахьан малагӏа да а, цудухьа уж духьалбаьлар полице болхлочунна», - аьлар «Сердало» газетага Гӏалгӏайчен тохкама комитете.
Карарча хана из гӏулакх дӏахо тохкаш да. Боахама болхлой хиннар меттаоттадеш, тешал дергдола кӏийле лохаш къахьегаш ба.
