Гӏалгӏайче кхаь сахьата эттӏадеш, меттаоттадир бера кулг
Гӏалгӏайчен лораша чоалхане хьал этта операци дӏайихьар, цхьа шу ах шу даьннача бера йоккха чов хиларах, яхаш, хоам бир «Сердало» газетага Гӏалгӏай Республикан унахцӏенон Министерствос.
«Салоӏаш долча деношка, Ужахьанаькъан Къамбулата цӏерагӏча берий ДКБ сиха кхоачадир кулга йоккха чов хинна бер. Из нийсделар цӏагӏа болх беш латтача электрически гӏирса кулг юкъедисарах.
Цун кхы хьем ца беш операци е лаьрхӏар. Лорий аьттув баьлар из цу юкъера хьадаккха. Цул тӏехьагӏа гуш хилар кулг а пӏелгаш а аьталга, из дӏа-хьа хьоалуш а дацар, иштта цхьайола тӏехкаш каг а яьяр», - аьлар хоамо.
Кхаь сахьата операци дӏайихьар травматолог Хьаьшанаькъан ӏийса керте а волаш. Дохадаь кулг меттаоттадеш чӏоагӏа къахьийгар, кхоалагӏа, биълагӏа, пхелагӏа пӏелг дӏа-хьа хьоабеш дола мазаш меттаоттадир, иштта кагдаь хинна кхоалагӏа, биълагӏа пӏелгаш дӏачӏоагӏдир.
Карарча хана цу бера могашал во яц ала йиш йолаш я. Лакха говзал йола лораш хилар бахьан долаш, кулг дӏа ца доаккхаш дисар.
Хӏанз из бер лорий теркама юкъе да, дӏахо кхы а кулг болх беш хургдолаш дарба де дезаш да.
