Математиках экзамен дӀалуш ба республике
27.05.2025 11:37
БӀаьстан тӀехьарча бетта 27-ча дийнахьа математиках экзамен дӀалуш хилар мехка. Из хоам «Сердалога» бир дешареи Ӏилмани гӀулакхех йолча Министерстве. Из экзамен дӀаяла дехар чуденнараш 3000 совгӀа дешархо вар, царна юкъера 2091 – базови оагӀонца дӀалуш вар, 620 - профильни. Республикерча 11 моттиге дӀахьош яр экзамен, цу юкъе я ФКУ СИЗО -1 ОФСИН.
«Аттестат хьаэцаш, дӀаяланза яргйоаца экзамен я математика. Профильни оагӀонца дӀалураш вузе деша оттараш ба, юхебисараша - базови.
Из эш аттестат хьаэцара. Профильни оагӀонца эггара лохагӀа 27 балл хила еза, базови - пхи балл. Аттестат хьаэцаш, кхаь баллал кӀезигагӀа хила йиш яц.
ДӀа ца луш бисараша из экзамен юхаяла йиш я ахкан хьалхарча бетта 20-ча, 23-ча деношка», - дийцар министерстве.
