Гӏалгӏай мехка гучадаьлар 1,6 млн сом лочкъадаь хилар

«Тохкамхоша яхачох, 2024 шера лайчилла бетта бехк беш волча сага банка ахча карадерзадир мобильни бувзамга гӏолла, 1,6 млн кредит ийца. Шийх дола хоамаш дӏаоалача хана, цо тийшаболх бир; Москвера прописка, лакха алапи да ший, аьнна. Банко из болх аттача наькъах чакхбаьккхар, цу сага лакхе белгалдаь ахча дӏаделар. Юххьанца денз, 46 шу даьнна маӏасаг лаьрхӏа вацар шийна банко тӏадилла декхар кхоачашде.

Цхьа ха яьнначул тӏехьагӏа, цу сага ше банкрот ва, аьнна, хоам бир арбитражни суде. 2026 шера, бекарга бетта из таро йоацарех (банкрот) лаьрхӏар, дӏахо кредит дӏадала ца дезаш мукъаваьлар. Прокуратуро уголовни гӏулакх кхы тӏа тахка дӏадахьийтар Гӏалгӏай Республикан Шолжа кхален суде», - аьлар тӏахьожама боахаме.