Юкъера хьаийцача, из да 78% кхоачаш, ахчанца лаьрхӀача 3,5 млрд сом. Из лурчогӀа, 2023 шера, хинначул 11% дукхагӀа да, дика гуш бола толам а ба, цу даькъ тӀа баьккха, яхаш, хоам бу «Сердало» газетага Къилбаседа Кавказа россетиий зарбан болх лелабераша.

«Къаьстта белгалду, вахара-коммунальни боахама оагӀорахьара дукхагӀа хьачуденнад из ахча. 2024 шера цо хьачуделар 462,8 млн сом, из 59,3%, е 354,9 млн сом дукхагӀа да, лурчогӀа хинначул. Иштта бахархоша а дикагӀа хьабеннаб из мах, геттара дукха беце а, 2% дукхагӀа», - аьлар хоамо.

Цу тайпара толам баккха таро хилар «Къилбаседа Кавказа россетий» оагӀорахьарча наха из хьал тоадара бола болх даим дӀахьош хиларах, ахча доаллача нахаца бувзам лелабарах. Компани лаьрхӀа я дӀахо а нахага декхар доалларгдоаца болх дӀабахьа, хӀана аьлча токах дола ахча Ӏаьдала дӀалуш хиларо мара мехка тока хьал дегӀадоаладе таро хургьяц.

Дикача оагӀорахьа из хьал тоаденна дале а, ГӏалгӀайчен электроэнергех дола юкъара декхар 2024 шера 7,8 млрд сом да. Цо дикка юхатетт мехка электросетий болх кердабаккхара гӀулакх, тоадара балхаш дӀадахьара даькъ тӀа де дезар. «Къилбаседа Кавказа россетеша вай бахархой тӀахьех тайп-тайпарча наькъашца шоашта тӀера токах дола декхар дӀадаккхара. Цу гӀулакха гӀо деш я «Свет Онлайн» (хьачудаккха йиш йолаш да GooglePlay е AppStore), «Доалахьара кабинет» я компане сайта тӀа, иштта кхыйола ахча дӀадалара лаьрхӀа оагӀонаш я.