Газа турбаш хувцаш, цу тӏехьа наькъаш меттадоаладеш къахьегаш ба мехка
Мехка газа оагӏон хьал меттадоаладара тӏехьа боккха болх ба дӏахьош. 2022-ча шера денз, 235 моттиге хувцамаш деш, 225 километр керда газа турбаш чуйоахкаш къахьийгад республике. Къаьстта терко еш ба мехка цу балхашта тӏехьа наькъаш тоадара. Лотораш дара меттел, ерригача моттигера асфальт хувцаш, къахьегаш ба болхлой, урамий хьал юххьанца хиннача тайпара хургдолаш.
«Сердалога» мехкарча Паччахьалкхенгара бенача хоамах, Илдарха-Гӏалий тӏарча 15 урам тӏа керда асфальт ӏобуллаш боахк тахан, 25 эзар квадратни метр доазув да цу балхо чулоацар, 26 шахьара моттигашка деш хувцамаш да уж. Шолжа-Шахьаре, Эбарга-Юрта 50 километрага кхоача газа турбаш хувцаш баьхкаб, 38,7 эзар кв.метр никъ ба тоабаьр. Илдарха-Гӏалий тӏа из болх чакхбаьккхаб 24 километр доазон тӏа, 7 эзар квадратни метрага кхоачаш долча доазон тӏара никъ тоабаьб, дӏахо кхы а 18,2 эзар квадратни метр доазон тӏара никъ меттабоалабе безаш ба болхлой. Магасе, Наьсаре газа оагӏув тоабеча балхо дӏалаьцар 44 км кхоачаш доазув да; цул совгӏа, 43,1 эзар кв. метр никъ тоабаьб. Эггара дукхагӏа из болх Магӏалбике дӏабихьаб – 100 километрага кхоачаш газа оагӏув я тоаяьр, 54,6 эзар квадратни метр дӏалоацаш бола никъ меттабоалабаьб.
Мехкарча паччахьалкхено белгалдечох, цу оагӏонцара болх дӏабахьар карарча хана 82%-га кхоачаш да республике, эггара хьалхарча оагӏонца хувцамаш де деза моттигаш къоастаеш дӏахьош латт болх.
