Гӏалгӏай мехка новкъостал дир, вахара гӏонна лу ахча хьа ца луш йисача боккхача дезала нанна
Зӏамига ворхӏ бер кхоабаш (царех цаӏ саг уллув хила везаш а долаш) ягӏа нана новкъостал дехаш ера, Гӏалгӏайчен сага бокъонех викал волча. Цу кхалсага хоам бир, хьалхагӏа берий ахчаш луш хинна ха чакхъяларах, цо ший ханнахьа цаӏ дола пособи хьаэцара каьхаташ дӏадахьийтар, из ахча дӏахо хьаэцара, бакъда Россе Вахара ганзо цун ахча хьадаланзар. Цу кхалсага яхачох, цун ахча соцадар бахьан да, каьхаташта юкъе цхьа гӏалат нийсдалар, цудухьа цу боахамо каьхаташ чакхдалийтадац.
«Сага бокъонех волча викала из дош дӏадахьийтар СФР, цу кхалсага яхар иштта дий хьажар духьа. Цига белгалдир, боахамашта юкъера бувзам лелабеча даькъ тӏара, из ший могаш доацача берага хьежаш я аьнна тешал деш бола хоам баьбац. Из бахьан долаш ахча юхасоцадаьд. Уж деррига кхоачамбоацараш юкъера а даьха, СФР хоадам болаш каьхаташ нийса чуделча, из гӏулакх бокъолгахьа даьлар. Цун доагӏаш хинна ахча деррига хьаделар, 100 процент йолаш массадолча берашта», - аьлар «Сердало» газетага ГӏР УПЧ хоамий даькъ тӏа.
Цу тайпара, сага бокъонех вола викал юкъевена хиларах, боккхача дезала наьна бокъо меттаоттайир. Хӏанз дерригача берашта ӏаьдало луш дола пособи хьаийдергда цо 100 процента боараме.
