Республике лаьттача йокъало зе даьд, гурахьа дувча ялата
Республике бӀарччача ахканна лаьттача 35-40 градусага кхоачаш йолча йӀовхало, догӀаш кӀезига хиларо дикка зе дир гурахьа дувча ялата. 71 гектар долча ялатий кхаш тӀара, 26 гектарага кхоачача оахамаш тӀара ялат дайнад. Ахчанга диллача 375,9 млн сом да из. Из белгалдир вай Мехкадас ший телеграм-оагӀон тӀа.
Мехка кулгалхоч белгалдечох, 200 фермер, сов дукха зе хиларах, гӀо деха дезача эттар. «Юртбоахама гӀулакхах йолча министерство боккха болх дӀабихьабар ялат кӀалхардаккхара гӀерташ, бакъда, хинна зе гуш да тахан.
ЧС болх боаржабе лаьрхӀар МагӀалбика, Шолжа, Наьсарен кхалешка, иштта МагӀалбике, Илдарха-ГӀалий тӀа, Шолжа-Шахьаре, Наьсаре.
Юртбоахамца дувзаденна гӀулакхаш вайна массанена лоархӀаме да. Воашта могар де хьажа дезаш, тесса дита йиш йоацаш, хьал да тахан эттар», - белгалдир вай мехкадас Келаматанаькъан Махьмуд-Ӏаьлас.
