Гурахьа дийна ялат чуэцаш да
Ара хаоттам ший тайпара - цкъа йӀайха, тӀаккха чӀоагӀа догӀаш делхаш - бар аьнна доацаш; гурахьа дувш дола а иштта хьалха кхачаш дола а ялат чуийца дала доалл, из болх йистебаккха лаьрхӀад ахархоша, маьцхали бетта цхьоалагӀча денга кхоачаш. Цох ший телеграм-каналега гӀолла яздир массахана цу гӀулакха тӀахьожам лоаттабеш волча ГӀалгӀайчен Кулгалхочо Келаматанаькъан Махьмуд-Ӏаьлас.
Укх ханага кхоачаш, ахархоша ка бола ялат чуийцад 59% лаьттан тӀара.
«Хала хете а, ара чӀоагӀа йокъал этта хиларах, цхьайолча моттигашка ялат телхад. Цудухьа, юртбоахама Министерствонна тӀадиллар ялат кӀалхардаккхар болх вӀашагӀболла, аьнна, дукхагӀа зе хиннача боахамашта новкъостал дергдолаш.
ХӀанз лоархӀамегӀдар да, ялат чуэцарал совгӀа, хьатӀадоагӀача Ӏанга кийчо яр. Цох тийша я ГӀалгӀайчен кхачан кхерамзле», - аьлар республикан Кулгалхочо.
