Цхьаькха лоархӀаме никъ тоабаь баьлар вай мехка
Таханарча дийнахьа боккха лоархӀам бола никъ ба тоабаьр - «Заьзгакъонгий-Юрт- Махьмад ХитӀе - Моздаке». 5 км латташ бола никъ тоабаь йистебалар гӀадвугаш да. Из хоам тхога бир Мехкадаь зарбан болх лелабераша. БоаггӀача боараме йистебаьккхаб из болх, хьинаре къахьегаш баьхкар цига болхлой, сихагӀа йистебовла гӀерташ.
«Наькъаш тоадар тахан керттерча гӀулакхех да вай мехка. Наькъаш дика хиларо йоккха паргӀато ю машенашца леларашта.
Цул совгӀа, 2027-гӀа шу тӀакхачалехь, 85% наькъаш боаггӀача боараме тоадаь латташ хилийта, аьнна, тӀадиллад вайна РФ Президента.
Из гӀулакх вайна дика чакхдоаккхалургда, аьнна, дог тийша ва со; хӀана аьлча «Кхераме доаца дика наькъаш» яха къаман проект йоаржаяра тӀехьа хьалхаяьнна йолхача моттигашта юкъе да вай», - белгалдир вай Мехкадас, наькъаш тоадеш къахьегарий болх лакхача боараме оттабеш.
Цу беркатеча программага гӀолла тоабаь ба тахан «Заьзгакъонгий-Юрт - Махьмад ХитӀе-Моздаке» яха никъ.
