ЛоархӀаме никъ тоабаь баьлар
ГӀалгӀайчен наькъашка хьожача болхлоша тоабир машена никъ «Керттера никъ.Кавказ» - Наьсаре- МагӀалбик- Лохера Курп-Тирк», из бӀаьха ба 5 км совгӀа, яхаш, дийцар «Сердало» газетага ГӀалгӀай Республикан машина наькъа Министерстве.
Из никъ лоархӀаме ба, цо вӀаший хотт массехк йоккха юрт, цунца дувзаденна массайолча хана транспорт хул цу новкъа, цул совгӀа дукха нах дӀа-юха кхувла транспорт а цига гӀолла лелаш я.
«Кхерамзлен дика наькъаш» яха къаман проект кхоачашъеш, беррига къаьнара никъ хьалбаьккхаб, иштта хийцай цигара къаьнара хин турбаш, ши оаса бохийташ керда никъ Ӏобиллаб, таханарча замо дӀадеххача тайпара дикал а йолаш.
«Из чакхбаллалца ӀоегӀай водителашта наькъ тӀара хьал довзийтара йола белгалонаш, наькъа йистошка карташ яьй, наькъ тӀа кӀай оасаш дахийтад, чура сердал луш бола гӀирс а вӀашагӀбеллаб», - аьлар наькъаш тоадераша.
Белгалдоаккх, 2024 шера республике, «Кхерамзлен дика наькъаш» яхача къаман проекта чудоагӀаш 28 км гаргга машена наькъаш тоадаь хилар.
