«Экология» яхача къаман проектах 450 млн сом хьожадаьд из нувхий гув дIабаккхара. Экологически проекта бюджета 978,5 млн сом да цунга дIадодар, хьалхара ахчанцара новкъостал 468 млн сом кастлуш хьакхоачаргда, ер шу чакхдалале цу балха хьалхара дакъа йистедаьнна хургда.

Эксперташа яхачох, из нувхий аре вIаштIара даьча, нах чубахача цIеношта гаьнна йоацаш я, цо дIалаьцай 20,8 гектар, цу юхе кхы а шахьара кварталаш а юрташ а яда, цудухьа из цигара дIаяккхар чIоагIа лоархIаме да.

РФ Iалама министерства соцамах МагIалбика нувхий аре, кхы а ши шу хьалха денз, гонахьа бахача наха зе деш хилар бахьан долаш Паччахьалкхен реестра юкъейоагIаш я, хIаьта «ЦIена мохк» яхача региональни проектах 2021-2022 шерашка из цигара дIаяккха оттаяьй.

Шин даькъа дувзаденна хургда цига деш дола балхаш. Карарча шера бе безача балха кийчо яра гонахьа карт а яь, лаьтта хьанийсдаь, дIатIаваха моттиг тоаяь, гонахьа тIаяьнна йоархIаш а дIаяьха лостамбергба.

ШоллагIа бола гIа хургба, технически Iалашо яр, нувхаш дIахьокхаргйола моттиг кийчъяр, уж хьагулъяра а болх дIабахьара а кийчо яр. Из болх йистебаккха лерхI 2022 шера.