Гӏалгӏай паччахьалкхен университете; журналистика, хӏама меттаоттадар ӏомадергда
Гӏалгӏай паччахьалкхен университете дийцар кердача шин дешара оагӏонаш хьакхолларах, уж дешара программаш чӏоагӏа эшаш я мехка: «Журналистика», иштта «Культуран тӏехьален гӏишлош меттаоттаяр». Из гӏа ба хьалхара боаккхаш кердача дешара шера, цо хьагойт республике лакхара дешар дегӏадоагӏаш хилар, иштта кагирхошта керда таронаш лу, мехко дӏадехар кхоачаш а деш», - аьлар «Сердало» газетага цу дешара моттига зарбан болх лелабераша.
ИнгГУ филологически факультете дӏайолаяьй «Журналистиканна филологически ӏалашо яр» яха программа. Хьалхара шийтта студент, царех бюджета ларда тӏа дешаш ворхӏ а волаш, хӏанз деша дӏаволавеннав. Дешара даькъ тӏа лаьрхӏад овлангара дешар практикаца цхьана хилийта, из студенташа хьаэцаргда университета хьехархошкара, иштта Гӏалгӏайчен хьалхалаттача журналисташкара.
«Вайна эшаш ба профессиональни болхлой, хоамий даькъ тӏа лоархӏаме декхараш кхоачашдара, тамашийна культуран тӏехьале лораяра. Из ший аргӏ-аргӏагӏа дӏабахьа безаш болх ба, цо таро лургья чӏоагӏа кӏийле хилийта, юкъардар дегӏадара, кагирхошта таронаш лургья», - аьлар республикан кулгалхочо Келаматанаькъан Махьмуд-Ӏаьлас.
Журналистикаца цхьатарра ИнгГУ кийчбе болабу хӏама меттаоттадара бола говзанчаш, из лоархӏаме да Гӏалгӏайченна, дӏаьхий долча ший исторически сийленгашца, культуран тӏехьален гӏишлошца. Уж программаш хьаелларо тешал ду, Гӏалгӏай университет таханарча дено дӏадехар кхоачашде гӏертилга.
«Кхетаду, Гӏалгӏайче чӏоагӏа тоъаш бац дика кийчбаь журналисташ. Тахан вай студенташ - уж республикан хургбола медиа хьала викалаш ба. Царна овлангара хьехам баларал совгӏа, СМИ балха даькъ тӏа дика говзал лургья», - аьлар ИнгГУ ректора Ӏалбаканаькъан Фатимас.
