Тӏой-Юртара наькъаш тоаде дӏаболабелар
Гӏалгӏайчен Наьсарен кхален Тӏой-Юрта, республикан кулгалхочо Келаматанаькъан Махьмуд-ӏаьлас хьалхашка оттадаь декхар кхоачашдеш, наькъаш тоаде болабелар. Из гӏулакх цхьана хьаллоацаш ба доал деча даькъ тӏара кулгалхой Исмейланаькъан Амиран, Зурабанаькъан Мухьмад. Шерипова А. цӏерагӏча, Ингушски урам тӏа болабеннаб наькъаш тоаде. Цунца цхьана тоадара балхаш дӏадоладергда Ингушски ах урам оалача даькъ тӏа, цига 5 метр шера, 280 метр бӏаьха никъ тоабергба.
«Уж урамаш тӏадолхаш да керттерча гӏишлошта: дарбанчена, №1 йолча дешара моттига, физкультурно-унахцӏенон комплекса, берий беша. Доазув да къаьстта историко-патриотически лерхӏам болаш. Ингушски урамах бах СВО тӏема декхар кхоачашдеш веннача Коазой Исмаӏала Аслана дезал, иштта кхыбола Коазой дезал а бах цига, царна юкъера нах хӏанз а тӏема мугӏарашка латташ ба. Укхаза вах Сийлахь-боккхача Даьймехка тӏема ветеран Коазой Хьасана Хьусен, цун уллув да цӏихезача Кавказа туземни дошлой бӏун доакъашхой тӏехьений цӏенош», - аьлар «Сердало» газетага Гӏалгӏайчен Паччахьалкхене.
Керда машиний никъ ӏобилларо, дукха нах лелача моттиге гӏашлой наькъаш дахкаро таро лургья наькъашкара зуламаш лаьгӏде. Никъ тоабаро, юртара вахара хьал тоадарал совгӏа, транспорт хьакхоачаш хилара а аьттув лу.
