Къахьегама чӏоагӏо яь каьхат доаца болхлой гучабаьлар Илдарха-Гӏалий тӏа
Шахьара моттигашка базар лелаеш барашка цу оагӏонцарча чӏоагӏонах дола каьхаташ доацилга гучадаьлар Илдарха-Гӏалий тӏарча прокуратуран болхлошта. Из хоам «Сердалога» бера цу моттигера.
«Рейд дӏаяхьа арабаьннараша теркалдир, («Мега», «Cӏty центр», «Оптови склад №1») кхаь тикага, иштта (Cup&Cake) кофейне къахьегама гӏулакхех йолча бокъоно оттадаьрашца кхоачамбоацараш долга, ийс болхлочунца къахьегама оагӏонца оттаяь чӏоагӏо яцар», - йоах тхога бенача хоамо. Уж кхоачамбоацараш тахан къахьегама оагӏонцарча балха новкъарле еш, чакхдалийта йиш йолаш дац.
Шахьарерча прокурора гӏалатбаьннарашта духьала 4 гӏулакх хьадийллад, шоай декхараш боаггӏача боараме кхоачашдеш цахилар керте оттадеш. Мехкарча къахьегама гӏулакхех йолча Паччахьалкхен инспекце дӏачудахийтад уж.
