СВО доакъашхошца, цар дезалашца кхетаче дӏайихьар Илдарха-Гӏалий тӏа
Тӏема операце доакъашхой оагӏув хьаллоацаш, кхоачашде дезарех дувцаш кхетаче дӏайихьар «Даьхен лорабой» яхача ганза мехкарча филиала болхлочо Темарханаькъан ӏийсас, Илдарха-Гӏалий тӏарча администраце кулгалхочун гӏонча волча Йовлой Тимура.
«Кхетаче дакъа лоацаш бар СВО доакъашхой, цар цӏагӏара нах, тӏема аренашка къонгаш байнараш. Кхетаче дийцар тӏемахошта, иштта цар цӏагӏарча наха лорашка чакхбоахаш, санаторе бохийташ, вахарера кхоачамбоацараш меттадоаладеш новкъостал лоаттадарах, массахана царца бувзаме хиларах», - «Сердалога» из хоам бера «Даьхен лорабой» яхача ганза филиалера.
Кхетаче гулбенна хиннарашца цар вахарерча гӏулакхашца дувзаденна деррига хаттараш доашхаш, дезар, эшар фуд тохкаш, болх дӏабихьар. Цхьаццадараш цу сахьате къоастаде аьттув баьлар, хӏаьта цхьадолча гӏулакхашка гӏолла хӏара моттиге дӏаболхаш, тохкам беш къахьега деза. Шахьара администраце кулгалхоша, ганза мехкарча филиала доакъашхоша боаггӏача боараме кхоачамбоацараш меттадоаладеш болх дӏахьоргба дӏахо.
