Илдарха-Гӏалий тӏа «Даьхен лорабой» ганз нах тӏаэцаш хилар
Илдарха-Гӏалий тӏа лаьрххӏача тӏема операце бӏухой тӏаэцаш болх дӏабихьар «Даьхен лорабой» ганза филиало.
«Ганза керте латтача Оздой Муслима ладийгӏар шоаш терко лоаттаерий, лаьрххӏача операце доакъашхошта эша гӏулакхаш деча даькъаца дувзаденнача хаттарашка. Цига иштта хилар Гӏалгӏайчен Кулгалхочун Администраце, Паччахьалкхен викал Йовлой Мухьмад, шахьара мэр Дидиганаькъан Ахьмад, ГӏР гӏолла йолча СВО ветераний Ассоциаце кулгалхо Саккхаланаькъан Муса, «Са бизнес» АНО кулгалхо Албохчанаькъан Исмаӏал. Кхетаче дӏахьош уж хьежар бӏухой дезалашта новкъостал де, вахар хьаллоаца ахчаш дӏадалара хаттараш кхоачашде. Кӏезига дацар лорий новкъостал дехаш дола хаттараш а, каьхаташ вӏаштӏехьадоахаш новкъостал эшараш а бар, иштта балха моттиг езаш, юха дешар кердадаккха ловраш а бар», - аьлар хоамо.
Наьха хаттарашта хоадам боллаш жоп делар. Дукхагӏдараш цу моттиге кхоачаш а дир. Кхыча моттигашцара бувзам безараш шоай теркама юкъеийцар.
«Уж бахача дӏа а водаш, дӏахьош йола кхетаченаш накъайоал тха новкъостал эшаш болча наха. Тхо хьожаш да сиха наьха хаттараш кхоачашде, царна эшаш дола новкъостал массадолча даькъ тӏа лоаттаде», - аьлар Оздой Муслима.
