Кхерамзленца дувзаденнарех дийцар, Илдарха-Гӏалий тӏарча дешархошца
Кагирхошта юкъе нийслуш дола воча, цхьаккха тайпара вай мехка даржийта йиш йоацача хӏамаех дийцар къонабарашка, лаьрххӏа кхетаче дӏахьош. Царех да «колумбайн», «скулшутинг», «буллинг» яхараш. «Сердалога» из хоам бера Илдарха-Гӏалий тӏарча администрацера.
«Сердалога» бенача хоамах №3 йолча ишколе хилар из кхетаче. Дешархошца къамаьл деш бар мэре, депутатски корпуса, юкъарлон, кагирхой совета доакъашхой, иштта 18 шерга кхачанзача ондаргий гӏулакхех бола ГОВД оагӏон болхлой.
Къонабарашта цар хьалхадаьккхар, къаьстта интернета оагӏонашка лоралуш хила безилга, наха юкъе юкъ ехкаш, сийза боахаш, бегбоахаш дола хӏамаш леладе йиш йоацилга, къаьстта къонабараш цхьацца зулам доаржаде, хьалхьоаде гӏертарашка ладувгӏаш, цар яхар хьаллоацаш хила йиш йоацилга.
Белгалде деза, дешархошта юкъе каст-каста иштта болх дӏакхахьар, тахан латтача хана лоархӏаме долга.
