Илдарха-Гӏалий тӏа даим терко лоаттаергья СВО даькъ тӏа веннача турпалхочун дезала
«Даьхен лорабой» ганза гӏалгӏай филиала викалаш Темарханаькъан ӏийса, Чиймарзанаькъан Марем, веннача бӏухочун Харсенаькъан Рамзана дезалца цхьана - цун фусам наьнаца, берашца - бахар Илдарха-Гӏалий тӏарча «Бералла мохк» яхача берий беша. Къаьстта вахара дешашца бувзабенна болх лелабеча болхлочо гӏо дарах, таро хилар Даьхе лораеш веннача бӏухочун бер цу деша даха ха йоацача моттиге дӏаоттаде.
«Хьалхагӏа, СВО веннача доакъашхочун фусам-нанас дехар даьдар «Даьхен лорабой» ганза филиала вахара дешашца бувзабенна болх лелаберашка; ший бер деша даха ха йоацача моттиге дӏаоттаде, аьнна. Цар сиха каьхаташ вӏаштӏехьа а даьха, цар цӏен гаьна йоацаш йолча моттиге из бер дӏаоттадир. Тахан ганза болхлой бахар зӏамигача бера хьал цига миштад хьажа. Царна гуш хилар из цига дика дӏаӏемалга, цун дукха керда новкъостий болга, хьехархой теркама юкъе из долга», - аьлар «Сердало» газетага «Даьхен лорабой» ганзе.
Цу ганза болхлой цкъа новкъостал даь ӏац. Цар веннача бӏухочун дезал даим шоай теркаме хургболаш тӏаэц. Вахарца дувзаденнача дешашка хьожараш, моллагӏа дола хаттараш нийсделча; венначун гаргарча нахаца даим бувзаме ба. Царна эшаш дола гӏо лоаттадергда ца хадаш.
