Илдарха-Гӏалий тӏарча кхалсага тӏера газах харцахьа хьатеха 169 эзар сом декхар дӏадаьккхар
Илдарха-Гӏалий тӏарча прокуратуро, вахара-коммунальни боахама даькъ тӏара закон кхоачашдеш дий хара болх дӏабихьар. Цига къоастаеш яр, моттигерча яхархочо ший бокъонаш телхаеш хиларах дувцаш чуденна дехар. Из латкъаш яр газа боахама.
«Тӏахьожама кхетаченаш дӏахьош лаьрхӏар, 2025 шера кӏимарса бетта денз 2026 шера аьтинга беттага кхаччалца, ший цӏагӏа лелаяь йоацача газах ахча дӏадаьккха хилара гӏулакх къоастаде. Газ мел лелаяьй хара бола гӏирс дика болх беш бале а, цар ахча кхыча боарамах хьатехад. Цу тайпара декхар хилар 169 эзар сом», - аьлар «Сердало» газетага Гӏалгӏайчен Прокуратуре.
Закон телхадеш юкъедаьнна кхоачамбоацараш юстардахара, газ лоаттаеча моттига кулгалхочунна из хьал тоадар хьалхадаьккхад. Прокурора баьча балхаца белгалдеш дола кхоачамбоацар юстардаьккхар. Карарча хана цу кхалсага декхар газа счётчико хьатехачунга хьежжа хьанийсдир, ца доагӏаш хьа мел теха ахча тӏера дӏа а доаккхаш.
