Искусствай колледже белгалдир, Халкъашта юкъера наьна метта ди
ГӏалгӀайчен Паччахьалкхен искусствай колледже кхетаче дӀайихьар, из хетаяь яр Халкъашта юкъерча наьна метта денна. Цу кхетачен цӀи яр «Наьна мотт - халкъа са», из вӀашагӀъеллар яр гӀалгӀай метта, литературан хьехархо Белхарой Райхьант. Цо хьалхадаьккхар студенташта герга истол дӀахьош дакъа лацар, из лаьрхӀа дар гӀалгӀай метта маӀан довзара.
«Кхетаче дика вӀашагӀъеллаяр. Цига дакъа лоацаш бар студенташ, цар шоашта ховш дар декъар, шоай вахарера цхьацца дола масалаш кхувлар. Студенташа йийшар цӀихезача гӀалгӀай классикий байташ. Хӏара кхоллам ма ярра гойташ бар гӀалгӀай метта хозал, кӀоаргал»,- аьлар «Сердало» газетага искусствай колледже.
Цу кхетаче лакха мах оттабир гӀалгӀай метта хозала, из бӀаьхий хилара, гӀалгӀай мотт- из къаман дог хилара.
Гулбеннараша дийцар, тахан гӀалгӀай мотт лорабара декхар массанена хьалхашка латташ хилар; лингвистий, хьехархой декхар хинна Ӏац из; из иштта декхар да вай къонача тӀехьен. Къаьстта кагирхой ба культуран тӀехьале лорае езара;, шоай мотт, Ӏадаташ тӀехьа тӀайоагӀача тӀехьенна дита дезараш.
