Республикан мехктохкама музее, «Россе байракх» яха гойтам ба дӏахьош
РФ Паччахьалкхен байракха Денна хетабаь «Россе байракх» яха гойтам хьабийллар, Малсаганаькъан Тухана цӏерах йолча музее. Цига гулбеннабар лоархӏаме хьаьший: тӏемхой бокъонаш лораярах йолча Комитета хьалха латта Могушканаькъан Радимхан, тӏема операце ветеран Бохтаранаькъан Батыр.
«Ураотташ латташ йола къона тӏехье Даьхенцара лерхӏам, безам боккха хила безилга хьалхадоаккхаш кхеяр лоархӏамеча декхарех долга белгалдир гойтам хьабеллаш къамаьл деш хиннача Пхьилекъонгий Аьсета. Магасерча лецея 9 «Б» классера бераш дар цига дакъа лоацаш. Зале гӏолла экскурси еш, берашта дийцар, Россе исторе оагӏонашца дувзаденнарех, паччахьалкхен дезадарий маӏан доккха, кӏоарга хиларах. Музей иштта дӏакхийтар «Российски лентилг» яха Ерригача Россе болам хьаллоацарех а», - йоах «Сердалога» цигара бенача хоамо.
Укх бетта 25-ча денга кхаччалца хургба из гойтам. Российски триколора истори довза аьттув ба мехкахой цу юкъа.
