Россе курортий столице Гӏалгӏай Республикан Денош дӏахьоргда
21.04.2026 12:48
Гӏалгӏай Республикан Денош хургда Соче, ӏан театра доазан тӏа укх бетта 25-ча денгара 27-ча денга кхаччалца. Цу гӏулакха кийчо еш ба культурах, туризмах йолча министерстве; «Вайнах» яхача Къаман культуран моттиго хьаллоацаш.
«Дукха хӏама да программан юкъе чулаьцар. Гӏалгӏай пхьараша шоай кулгашца хьаяьча тайп-тайпарча хӏамай гойтам боаржабергба цига. Бекарга бетта 27-ча дийнахьа Соче бахархой, хьаьший аьттув ба «Бека пандар, ека оаз» яха концерт го.
Паччахьалкхен филармоне артисташ хургба цига шоай начӏал дӏахьокхаш», - дийцар тха газетага. Мехкашта юкъера бувзам, барт чӏоагӏбара тӏехьа, къаман истореца, культураца дувзаденнараш доаржадеш, программ я дӏахьошъяр.
