«Оаздик» оалача лагере, хих мишта лорабала беза хьийхар МЧС болхлоша
Бераша салоӏача «Оаздик» лагере хих лоравалар мишта хила деза хьехаш хилар мехкарча «Тӏаргим» яхача МЧС оагӏон болхлой, иштта паччахьалкхен инспектораш. Моллагӏча хатара юкъе нийсбелча, эггара хьалхарча оагӏонца фу де деза дийцар цар берашта. «Сердалога» из хоам кхаьчар МЧС.
«Хин юхе салоӏаш болча хана, нийсдала йиш йола хӏамаш белгалдир МЧС. Нагахьа хатар нийсденнадале, ха ца йоаеш, де дезар фуд, миштад дӏахьекхар цар, бераша дикагӏа кхетадергдолча тайпара. Хи чу лелаеча къоанзолгех, гӏон «чархах» дийцар цар берашта. Иштта хин кӏалводаш латтача сага гӏо дар мишта хила деза гойтар», - йоах тхога бенача хоамо.
Моллагӏа хатар ийккхача цхьа секунд, минот цайоаяр лоархӏаме да. Корзагӏваьнна, веха ца а хьовзаш, шийна уллуврча сага ма хулла сихагӏа новкъостал де хьажа везилга белгалдир кхетаче. Лаьрххӏа терко еш дийцар, геттара чӏоагӏа цӏогӏа детташ, боккхагӏбарашкара оарц деха дезилгах, ӏалаьмате чехка «112» номерах хоам бе безилгах. Белгалде деза, иштта йола кхетаченаш берашца дӏакхахьар чӏоагӏа лоархӏаме, царна дукха хӏама довзийташ долга.
