ГӏалгӀайчен хьунашка акха хьайбаш, оалхазараш дагардеш болх дӀахьу
Республикан чарахьий болх дӀахьош ба, Ӏан замах акха хьайбаш, оалхазараш дагарде, цар хьал довза лаьрхӀа. Из хӀара шера, наджгоанцхой бетта 15-ча денгара тушола бетта 15-ча денга кхаччалца, дӀахьу. Шоай балха декхар кхоачашдеш, карарча шера чарахьал деча даькъ тӀа 109 никъ дӀабахьа беза цар.
Республикан Ӏалама Министерствос беча хоамах, из болх дӀабахьара йола план цар хьалххе а оттаю, шоай мичахьа гӀолла лела беза ховргдолаш. Цу тайпара беча балхо таро хулийт налаш, лийгаш, цогалаш, соалораш, пхьагалаш, бӀарашдуаргаш, акха жӀалеш, хьун кхокхарч, акха котамаш санна дола оалхазараш мел да ха.
«Оакхарий, лоа диллача цу тӀа йисача ларех, дагарде йиш хул; хӀаьта оалхазараш - шоашта новкъа нийсдаларга хьежжа.
Хӏара никъ шозза бе беза. Хьалхара никъ баьчул тӀехьагӀа, еррига лараш дӀайоаю цар; шоллагӀа никъ беча хана, кердаяраш дагаръю, ди-бийса даьнначул тӀехьагӀа.
Цига гулдаьча оакхарех долча хоамаша таро лу биотехнически хьал тоаде, хьайбаш таьрахь довза, хӀара шера тӀакхетараш мел да ха а йиш хул», - аьлар Ӏалам лорадара боахаме.
