Мехкарча хьунашта, массахана тӀахьожам лоаттабу
Хьун хьал лорадераша массахана тӀахьожам лоаттабу гаьнашта. ГӀажарий-Юртарча хьун боахаме чакхбаккха безаш мел хинна укх шерара болх йистебаьккхар болхлоша дӀадахача кӀира. Из хоам «Сердалога» бир Ӏалама гӀулакхех йолча Министерствос.
Хьун тӀахьожам лоаттабераша хан-ханнахьа лаьрххӀа дӀахьош боккха, лоархӀаме болх ба из.
«Цу балхацара керттердар, хьун боахама кхераме, зене дар ханнахьа гучадаккхар. Итт моттигашка гӀолла чакхбаьккхар болх.
Ха яхача, хувцалуча хаоттамо толхаяьча, иштта кхыдолча хӀамаша човхам баьча гаьний хьал тохк болхлоша. Даьла къахетамца, хьун боахама зене дола цхьаккха хӀама, лазараш гучадаланзар цига. Гаьнаш тӀа оттадаь йоазув кердадоаккхаш болх дӀабихьар цига. Вай мехкарча хьуний хьал малагӀча боараме латт гучадаккхара тӀехьа хан-ханнахьа чакхдоаккхаш гӀулакх да из», - дийцар «Сердало» газетага Ӏалама гӀулакхех йолча Министерствон болхлоша.
