Доацача бера 5 шера ахча хьаийдеш яьхай, вай мехкара 50 шу даьнна кхалсаг
09.09.2026 11:21
ӏаьдалгара хьадоагӏача ахчанца боккха тийшаболх кхостабаьча мехкарча яхархочун гӏулакх судага да. РФ УК 3-ча даькъа 159 ст. бехктокхаме озаш я из тахан.
«Тохкама оагӏон къахьегамхоша белгалдечох, 2010-ча шера йиӏиг малхаяьннай, аьнна, бух боаца каьхаташ вӏаштӏехьадаьхад цо. Цу каьхаташка гӏолла вӏалла доацача бера 2021-ча шергара 2026-ча шерга кхаччалца хӏара бетта ӏаьдалгара пособи ийдаьд цо.
600 эзар сом ахчанна зе даьд цо Россе Вахара оагӏонцарча ганза», - йоах «Сердалога» мехкарча прокуратурера кхаьчача хоамо. Магаса кхален суде дӏахо тохкаш латт из гӏулакх карарча хана.
