Магасе лоархӀаме никъ тоабеш латт
«Кхерамзлен дика наькъаш» яхача къаман проекта чудоагӀаш, Магас-Шахьара Базорканаькъан урамах, 1,20 км бӀаьхача наькъ тӀа сихбенна къахье, из тоабеш, яхаш, дийцар «Сердало» газетага ГӀалгӀай Республикан машений наькъа Министерствос.
Карарча хана, республикан машиний наькъа Министерствос дехарах болх беш йолча болхлой фирмо тӀера хьалбоаккхаш ба къаьнара асфальт, дӀахо ши оаса бохийташ из никъ чӀоагӀ а баь, цул тӀехьагӀа боккха, зӀамига жагӀа юкъе бола асфальт буллургба. Никъ Ӏобилла баьнначул тӀехьагӀа, йоагӀаш йола наькъа белгалонаш оттаергья, тӀаккха наькъ тӀа кӀайча басара оасаш дохийтаргда.
Белгалдаккха дезаш да, из никъ тӀабодаш ба центральни маьждига, цул совгӀа, цига тикаш хилар а лоархӀаме да бахархошта.
«Из 2024 шера лоархӀамеча декхарех цаӀ дар наькъа программа кхоачашъеча. Из болх йистебала йилла ха аьтинга бетта 30 ди да, бакъда болх сиха беш хиларга диллача, бинза бисар дукха цахилар а дӀалаьрхӀача, цу ханналца из гаьнабаргбац», - аьлар ГӀалгӀай Республикан машиний наькъа министра Хаматханаькъан Батыра.
Белгалду, ГӀалгӀай мехка хӀанз кхоалагӀа шу да «Кхерамзлен дика наькъаш яха къаман проект йиллача ханал хьалха йистейоаккха. Из проект хиларах, карарча шера республике 14 никъ тоабергба, уж да, юкъара дӀалаьрхӀача, 28 км дӀаьха.
