Магасе СКР кадеташта дийцар «буллинга» духьале лоаттаярах
Ишколе тӏехбеттамаш леладергдоацаш, иштта хьайца деша вагӏача сага дега вас еш хилча, фу де деза дийцар тахан Магасерча №1 йолча ишколерча 11-ча Россе СК кадетски класса дешархошца дӏайихьача кхетачене. Республикерча тохкама моттига болхло Горчхананаькъан ӏумар вар къонабарашца къамаьл деш хиннар. Дешархошта хьалхадаьккхар, бегаш бар боарамал тӏех ца воалаш хила дезилга, цхьацца ца доагӏа къамаьл деш, бала бахьача сага тӏаотта безилга, из чакхдалийта йиш йоацилга. СКР кадеташта довза деза лоархӏамедараш да уж, цунга хьежжа нийсхон, бакъдолча хӏаман тӏехьа хила беза уж миччахьа бале а.
«Россе СК доакъашхочо белгалдир, саг ӏотоӏаве, цунна халахетар де гӏерташ тӏехбеттамаш деш кхестар ӏаьдала бокъонца бехктокхаме озаш, цар даьшка, ноаношка хоаттаргдолаш хӏама долга. Бакъдоаца, тоам боаца хӏамаш доаржадеш саг сийза ваккха, цун дега човхам бе гӏортар чакхдалийта мегаргдолаш дац! Дешархой дукха хаттараш дар ӏаьдала болхлочунга дала, царца деррига доашхаш къамаьл деш, ха дӏайихьар цо. Белгалде деза, иштта йола кхетаченаш къонабарашца дӏакхахьар тахан къаьстта лоархӏаме долга. Къонача тӏехьенна хьалхадаха деза, кхыча сага тӏехбеттамаш де, хьаштдоацар дувцаш дог дохаде цхьанне бокъо йоацилга! Тха декхар да дешара моттигашкара хьал лорадар, низ беш дола цхьаккха во чакхцадалийтар», - дийцар «Сердалога» мехкарча Тохкама Комитете.
Эпсара кадеташта дийцар мехкарча Тохкама Оагӏон каналашка 24 сахьата болх дӏахьош болга. Моллагӏа ца доагӏа, кхераме дола хӏама нийсделча телефон тоха уукх номерах 123 е (8-8734-55-03-05 – оагӏув «Кхерамеча хьале да бер») телефон дӏатоха еза вӏалла хье ца луш, иштта гӏо деча оагӏон 8-8734-55-04-67 телефонах хоам бе йиш я.
