Магасе дийцар, Гӏалгӏайчен спортивни моттигаш дегӏакхувларах
Гӏалгӏайчен Паччахьалкхен Председатела Сластенин Владимира балха кхетаче дӏайихьар инвестицеш дегӏайоалаяра Департамента, Россе спорта паччахьалкхен доалахьарчун Министерстваон кулгалхочун гӏончаца Магомаевгӏар Темарланаца. Республикера спорт дегӏайоалаяра керттера хаттараш дувцаш дакъа лоацаш хилар моттигера физически культуран, спорта министр Белхарой Руслан. Паччахьалкхене уж вӏашагӏкхетара бахьан дар, йоккха инспекци дӏаяхьар - хьалха Россе спорта Министерствон викалаш, моттигерча балха новкъосташца бахабар республикан спортивни гӏишлош хьалъеча моттиге, цар мах оттабир цига беш латтача балха.
«Карарча шера республике спортивни даькъ тӏара йоккха гӏишлош хьалъеш я «Спорт - вахара боарам» яхача къаман проекта чуйоагӏаш. Йиъ «хьаькъале» спортивни майда хьалъергья Наьсаре, Сурхо тӏа. ӏаьлий-Юрта, Яндаре. Уж майдаш хургья футбола доазув а чулоацаш, цу юкъе баскетбола, воркаут-дакъа долаш. Иштта юрташка - Лохерча Ачалкхе, Инаркъе, Мужеча, Шолже хургья дукхача оагӏорахьара спорта доакъош чулоацаш йола спортивни майдаш.
«Мужече» хьалъеш йолча спортивно-ӏомабалара центре хургья модульни зал, цига цхьацца латара ӏомабалар дӏадахьа йиш хургья», - аьлар «Сердало» газетага Гӏалгӏайчен Паччахьалкхене.
Сластенин Владимира Магомаевгӏар Темарлана физически культура, спорт дегӏайоалаеш, иштта паччахьалкхен политика кхоачашъеш цо доккха дакъа лацарах, баркал оалаш, грамота елар.
Премьер-министра баркал аьлар хьаьшанна республике из варах, цо спортивни гӏишлош хьалъяра проекташ кхоачашъяр массайолча оагӏорахьара хьаллацарах.
