Терроризма юкъе вахар хаьдараш дагалаьцар Магасе
Терроризма духьала къовсам лоаттабарца цхьанкхетара Дийнахьа, цу доккхача зулама юкъе вахар хаьдараш дагалоацаш ба Магасе. Дийца варгвоацаш, хала денош такха дезаш хилар вай республика зуламхошта духьале еш. 20 шу хьалха цу бӏехача зулама хӏама дохадара наькъ тӏа дукха хама дайра вай къаман. Хӏара денна ӏаьдала болхлошта духьала зуламаш леладеш бар, шоай дегаца адамалах хӏама доаца уж бӏеха нах. Декхараш кхоачашдеча наькъ тӏа, республикан кхерамзле лораеш, дукхача яхь йолча, деналах бизза хиннача къаман къонгий вахар хаьдар.
«2004-ча шера ахкан шоллагӏча бетта зуламхоша мехка тӏабена бала? тахан хилча санна, чов хинна латт. Цӏаккха а дицде йиш ярех дац 2009-ча шера маьцхали бетта Наьсарерча РОВД коа эттар. Республика лораеш хиннача наькъ тӏа вахар хаьдарашта юкъе гӏалгӏай санна, кхыча къаман нах а бар. Шоай декхараш кхоачашде, аьнна, вай мехка хьабаьхка, республикаца цхьана цу халача деношта духьаллаьттар уж. Турпалал гойташ лаьттар дуккхабараш, вай дегашка массахана яхаргья цар цӏераш! Из хӏама цхьан дийнахьа дӏатийнарех дац… 2023-ча шера зуламхой карах полице ши болхло велар, 2024-ча шера Илдарха-Гӏалий тӏа терроризма духьалара операци дӏайихьар. Цу гӏулакхо хьагойт, бӏехача зуламхошта духьале лоаттаяра болх массахана фийла хила везаш болга.
Наьсарерча дагалоаттама Аллее даязъяь латт тайп-тайпарча шерашка шоай балха тӏа вахар хаьдача ӏаьдала болхлой цӏераш. Вай дегашта цӏаккха а бицлургбац мехка исторе баха биса уж нах», - язду ший телеграм – оагӏон тӏа вай мехкадас Келаматанаькъан Махьмуд-ӏаьлас.
Терроризм яхача доккхача, бӏехача зулама духьала къовсам лоаттабеча дийнахьа денала eрокаш, кхетаченаш, гойтамаш, спортацара яхьаш дакхухьаш ба мехка. Кагирхошта геттара лоархӏаме да из тахан. «Даьхен хӏама лорадар, воча хӏаман наькъаш тедар, зуламхой хӏама дохадар хӏаранега кхоачаш юкъара декхар долга белгалдеш ураоттае еза вай къона техье», - белгалдир вай Мехкадас.
